Plans e programas

O Plan de dinamización cultural recollía todo tipo de acontecementos artísticos, culturais e deportivos, así como as actuacións de investigación que se realizaron no marco da celebración do Ano Santo Xacobeo e a mellora das infraestruturas necesarias nesta liña. Este programa de actuacións englobou os seguintes aspectos:

• A recuperación da cultura e o folclore popular relacionado co Camiño de Santiago.
• O fomento e a difusión da investigación sobre a temática xacobea: estudos; recuperación e inventario do patrimonio documental; inventario dos recursos artísticos, culturais ou turísticos; bibliografías; cartografías; aplicacións informáticas asociadas aos recursos turísticos, artísticos ou culturais.
• A creación, produción e exhibición de espectáculos teatrais, musicais, de danza e audiovisuais relacionados co acontecemento, así como a mellora das infraestruturas culturais vinculadas a estes.
• A organización e produción de exhibicións e congresos, e de material gráfico e audiovisual relacionado, así como a edición de catálogos; todo referido ou relativo ao Ano Santo Xacobeo.
• A organización de actividades e exhibicións deportivas, tanto profesionais coma de afeccionados, que transcorreron ao longo das rutas xacobeas.
• A creación dun Plan de dinamización turística e de acollida do visitante
• A integración das diferentes iniciativas relacionadas co desenvolvemento turístico e a acollida do visitante con motivo do Ano Santo Xacobeo.

Tamén se aprobou un Plan de rehabilitación do Camiño de Santiago e un Plan de dinamización turística e de acollida do visitante, que integrou as diferentes iniciativas relacionadas co desenvolvemento turístico e a acollida do visitante con motivo do Ano Santo Xacobeo 2004. O programa de actuacións consistiu principalmente nos seguintes aspectos:

• A produción e edición de material gráfico de promoción e información: folletos, carteis e guías.
• A implantación de melloras tecnolóxicas destinadas a mellorar a información do visitante.
• A organización de viaxes destinadas aos medios de comunicación e aos operadores turísticos, co fin de que puideran coñecer in situ o proxecto xacobeo.
• O deseño de novas campañas de publicidade no ámbito nacional e internacional.
• A presenza en feiras nacionais e internacionais con pavillóns específicos onde se promocionou turisticamente o Camiño de Santiago.
• O investimento na modernización ou nova construción de instalacións turísticas e de acollida ao visitante.